حملة إلزمي الاستغفار ..... وستأتيك الدنيا راغمه وتسعدي في الدارين

09-12-2009, 01:40 PM

samsom جزيت خيرا ع المرور الكريم

09-12-2009, 01:45 PM

قصة الاخت المدلعه الحزينة ... مع الاستغفار

بسم الله الرحمن الرحيم
والصلاة والسلام على الرسول الكريم و
من
تبعه بأحسان ألى يوم الدين
هذي قصة رأح أسردها لكم وهي قصتي
بالتوظيف
أنا تخرجت عام 1418 هــ ألى أن منّ الله علي بوظيفة رسمي بعد عشر سنوات وكانت
بعد رؤيا ماسألت عن تفسيرها على الرغم أني
أحب تفسير الاحلام بالذات لما يكون شيء جميل
توظفت بعد معاناة ورغم أنف ؟؟؟؟؟؟؟؟؟؟؟؟؟؟
ورغم أنف الحساد
( حلمت أني طالعة من مدرستي لما كنت
متعاقدة وأشوف المشرفات يناظروا فيني
وبعدين دخلت غرفة شفت زميلة لي أيام
الكليه رميت شنطتي وحظنت زميلتي وصرت
أبكي فاأسمع صوت يقولوا وين أبوها دخل أبوي يمشي ( أبوي اصلا مريض بجلطه ومقعد ) فدخل علي وطلعوا زميلتي أنا عندي عادي ابغاها تجلس فقالوا لابوي وش تبغى فقال توظفوها وقفت أمام كتاب كبير وقالوا منظفة حواجب قلت لا انا ماأنظف الحواجب والحمدلله أنا ما أنمص ولا أشقر في الواقع قال وظيفه وأشوف اسمي بالكامل ورباعي
وصحيت من نومي مستانسه من الرؤيا
عندي يقين وحسن ظن بالله
طيب أنا متزوجه وزوجي عسكري كنت حاطه
ببالي يمكن يجيني (تعاقد ) لان الوظائف الي
أحصل عليها مؤقته مكان معلمة بدل رعايه
مواليد أو الي مقدمه أستثنائي
وكل سنه وأنا ركض على التقديم ولا مليت
ولايأست على الرغم أنه زميلاتي الي معي
ملوا وصاروا مايقدموا ابدا
وانا كل سنه متحمسه وتصوير أوراق وقفة
وتنزل شروط الوظايف العام الماضي ومن
الشروط أنها تقدم مقر ولادتها أو مقر عمل
ولي أمرها وكان الاحتياج في منطقتي قليل
جدا وعزلوا عننا المحافظات يعني يأس
مابعده يأس
شلون أقدم وأنا مولوده في مدينة وزوجي
كذلك وهو أصلا عسكري مالي أحقيه إني
أقدم بالمحافظة أبدا
طيب الرؤيا الي شفتها وشلون تفسر الحلم

طبعا الرؤيا قبل التقديم بكم شهر بس ماأدري الاحساس الي أنتابني حاسه أني رايحة
أتوظف بس ماكنت حاسه ومتوقعة الصعوبات
الي تواجهني والمشاكل والشكاوي اللهم
لك الحمد والله يرزقك بالوظيفة عاجلا أنت
وجميع أخواتي المسلمات
طبعا أنا متابعة أخبار التقديم والسنه الماضيه
شروط تعجيزيه وماتقدري تقدم الا في مكان
واحد طيب شلون أول شيء أخذت الكرت
حق أبوي الله يشفيه وحصلت اسمي موجود
هذا وأنا لي 12 سنه متزوجه أذكر مره قال لي
أبوي أشيل اسمك من الكرت قلت لا يابه
خليني معك الله يخليك وأنا وأخواتي الثنتين
الي أصغر مني كمان بالكرت والكرت قديم مره
لكن أمر الله قضى
لكن فيه مشكلة أن المكان المولود فيه أبوي
مو من القرى الي طالبينها القرية الي مكتوبه بالكرت باسم ( القبيلة ) والاحتياج مافيه ا
سم القريه لكن هي معروفه عند الناس الكبار
وقلت لاختي الثانية تقدم معي وأنه احتمال تجينا وفرص أكبر بالذات ان الاحتياج في هالمحافظه كثير ورحت وطبعا سافرنا يوم قدمنا كانت تسألنا المشرفه ايه القريه وانتم من فين وشلحت الدبلة خفت أنساها وتورط وأختي كانت حامل بس الحمدلله بطنها صغير وغثتنا هالمشرفة بتقديم الورق ساعة تسولف وأنا محروقة أعصابي وساعة تكتب الييانات وتسأل وأف ضاق صدري وطبعا قدمنا لاختي الثالثة على الرغم انها ماتبغى تكون بعيده عن زوجها وأنا قلت لاختي الحامل لاتقدمي لها مو جايها تعاقد بس نقدم لها رسمي وقدمنا وانتهت السالفة
ايش الصعوبات الي واجهتها
أقول لكم اتصل علي الديوان وقالوا مافيه شيء يثبت أقامة والدك إذا عندك أخوان يدرسون قدمي طبعا صرت أقول هذي القريه هي اسمها ( ؟؟؟؟؟؟؟؟؟؟ ) لكن أيام زمان مالها مسمى فكانوا يسمونها باسم القبيلة
واستبعدوا ملفي يعني رموه مع الملفات الثانية ماعندي أثبات إقامة
صارت أختي الحامل تلومني كله منك سمعت كلامك ياليتني قدمت في المنطقة _ ؟؟؟؟؟؟؟؟؟ وصايره متذمره
أنا وقتها صرت استغفر يومي كله والمسبحة بيدي حتى وأنا نايمه
طيب شلون رجعوا أخذوا ملفي وأنا القرية المولود فيها أبوي شاكين أنها من القرى التابعه للمدينة المنوره وكيف أتأكدوا

وسبحان الله وهم يفرزوا بالملفات حصلوا وحده مقدمه باسم أبوها ومولود بنفس القريه الي مولود فيها أبوي لكن كيف عرفوا أبو الي قدمت وكانت الشمعه التي أضاءت حياتي من غير ماتعرف
مكتوب اسم القريه صريح وبين قوسين الاسم الثاني للقريه الي مولود فيها أبوي وبكذا عرفوا أن القريه الي مولود فيها أبوي هي نفس القريه الي موجوده بالمحافظه وطبعا رجعوا من جديد يبحثوا عن ملفي وطلعوه وأتصل علي واحد من الموظفين بالديوان وسألني عن شهادة الخبره وتاريخها وسألته أنا خلاص توظفت قال أنت على بالك أنك توظفتي طبعا هو لاحظ علامات الفرح بصوتي وشوي أبكي قلت أيوه قال إن شاء الله وطبعا الموضوع حق القريه واستبعادهم لي في البدايه ماعرفته إلا بعد ما طلع اسمي وكنت طول الوقت استغفر مرت الايام ثقيله بالنسبه لي لأن هذي الفرصه الاخيره لي وبعد كذا بتطلع قرارات صعبه أكثر من هذي لا الأكل تهنيت فيه ولا النوم كأني أنتظر قصاصي شيء مرعب والانتظار ممل مرت الأيام بثقل وصعوبه ودخل علينا شهر رمضان واتصلت علي صاحبة المدرسه الأهليه لوظيفه وراتبها 1500 وجالسه أفكر لو أوافق يضيع وقتي بالتحضير ويروح علي رمضان وما أضمن أعيش للسنه القادمه وأنا ولله الحمد أجتهد بالعبادات وأحس إني متردده المهم من غير إحساس أتصلت وقلت للمديره أعتذر جدا وقفلت السماعه هذا يوم الأربعاء والحمد لله مستمره بالاستغفار ومن ترك شيء لوجه الله عوضه الله خيرا منه ويوم من الأيام كنت عند أهلي وسرحانه بوضعي وبالوظيفه إلا تتصل عليه وحده الله يرزقها ويرزقكم من خير الدنيا والآخره وتسولف معي وتقولي انتي توظفتي في المكان الفلاني ( القريه الي مولود فيها أبوي الغالي ) وأختك في قرية ( ؟؟؟؟؟؟؟؟؟؟ ) أنا ماني مصدقه وعلمتني انهم في الاول استبعدوا ملفي وبعدين رجعوا له لما تأكدوا من القريه إنها تابعة لنفس المحافظه وقتها ابي أصيح وأحظن أمي الي قلقتها معي طوال الوقت ومالي سالفه إلا الوظيفه اشغلتها دخلت على أمي بصوت مبحوح ماني قادره أتكلم وخنقتني عبرتي وبكيت الكلمه وقفت بحلقي أدخلها الغرفه ويالله طلعت الكلمه وأبكي وأمي معي تبكي طبعا هي دموع الفرح دخلت علي أختي الحامل وانفجعت تقول وأشفيكم قلت ولا شيء هيء شكت طوالي قالت توظفتي قالت شوفي لوتوظفتي لوحدك أفرح لك بالذات أنه لك 10 سنوات لكن الفرحة تكمل لو كلنا أنا ماعلمتها قلت خليها شوي تحس
بعذابي وبرضه كنت خايفه أقول يمكن ماهو أنا ماقلت إلا لأمي وأختي الكبيره وزوجي كنت أذكر لما أقدم ومايطلع اسمي اتظاهر قدام زوجي بانه عاد لكن لما يجي اليل ابكي بحرقه مثل الطفل الصغير أنا اتذكر أبوي وأنا صغيره كانت تنزل علينا أمطار غزيره والشوارع زمان ماهي مسفلته كان لابس البسطار ورافع ثوبه وشايلني أنا وأختي وشنطنا حتى يودينا على المدرسه الموقف هذا مستحيل أنساه
بحياتي الموقف هذا لو صار لأي وحده فيكم أيش تتمنى أكيد تتمنى أنها تتوظف وترد لأبوها معروفه ونسيت أقول لكم أن أختي الحامل ولدت فجاءه وهي بالسابع انفصلت المشيمه عن الطفل وصار معها نزيف ولدت بعمليه سبحان الله رغم إنها ماتحس بألم
طبعا رحمتها وعلمتها إنها توظفت
ونسيت أقول أن أختي الي ساكنه بنفس مدينتنا ( سبحان الله ) جاها تعاقد على الرغم إني قلت لاختي لاتقدمي لها تعاقد ماراح يجيها ( استغفر الله ) وسافرت لمقر عملها وسكنت عند أهل زوجها
ويوم طلعت الاسماء اتصلت فيني وبشرتني قفلت الجوال وحظنت أبوي وبكيت وأبوي يسألني أيش فيك أقول يبه أنا اتوظفت أخيرا
وهو يقول الحمدلله الحمدلله دخلت على أمي وبشرتها هي عارفه من أول ولكن الآن أتاكدت ( أن الي شفته بالمنام رؤيا ) الله يشفيك يابوي
ارسلت رسايل لاخواني كلهم جونا وباركولي ومستانسين لكن أقرب الناس لي ماأتصل وهناني ولا أحد أتصل تخيلوا أبدا الا وحده من خالتي وجدتي فقط والباقي لالالالا
لكن أنا ماأنتظر منهم شيء هم كشفوا الي بخاطرهم
وبعد العيد مباشره رحت أنا وأختي الي ولدت وسوينا المقابلة الشخصيه وكان الاشراف في هذي المنطقة مستغربين كيف اتوظفنا وأختي سوت المقابلة زين الي ولدت والا كان ورطتنا بيقولو ا شلون حامل وانت بكرت أبوي يالله أحسن خيره وانتهينا من المقابلة الي كانت تتخللها الخوف ومراجعة الدروس والذكريات
ولميت أغراضي ونقلت ملفات أولادي وعفش بيتي وجيت لهذه المحافظه لكن الصدمه الي ماتوقعتها والي سببت لي رعب ؟؟؟؟؟؟

طبعا خلال الايام الي راحت حلمت حلمين الحلم الأول إني شفت مديره كنت أدرس عندها وأنا متعاقده كانت صارمه ومعقده وشخصيتها قويه أنا من يوم شفتها عرفت أني في مشكله وبنفس الوقت أذكر حلمي في أبوي وارتاح

وعرفت الوقت الي حلمت بالمديره هذي استبعدوا ملفي أنا وأختي ومازلت في الاستغفار بعدها بفتره حلمت بأخوي واسمه ( ياسر )
عرفت انه راح يتيسر لي أمري وبالفعل
طبعا أنا من الفرحه بالوظيفه بسرعه نقلت أخذت عفش البيت كله ونقلت أولادي الي بالمدرسه وسكنت بشقه قريبه من مدرسة أولادي وقلت لزوجي أهم شيء التليفون لأني ما استغني عن حبايب قلبي ( أخواتي الغاليات بنات حواء ) طبعا أنا رحت بدري مره
واستقرينا أنا وأولادي طبعا عندي قرايب هنا أختي الي تعمل مشرفة إرشاد وعانت من المشرفات كانوا مستغربين كيف جتنا وظيفه
ومرت الأيام أبغى أدوام وأرتاح من الشكاوي كانت تقولي أختي المشرفه والله ماراح يتركوكم غير يشتكوا ونفسيتها تعبت أنا ماكنت مصدقه .
قلت مايقدروا يسون شيء
وكنت استنى أوراقي تروح للرياض بفارغ الصبر طفشت وكنت أكلم زوجة أخوي الظهر بالتليفون إلا يرن الجوال وأجي أناظر قفلت من مكالمتي ورديت على الجوال كان رقم ثابت

تدرون مين الي أتصل علي ؟؟؟؟؟؟؟؟؟؟؟؟

والله أكتب وأحس لحظات الرعب كأنها الآن قال الو السلام عليكم رديت وعليكم السلام

قال الأخت : ؟؟؟؟؟؟؟؟؟؟؟ اسمي واسم أبوي بالكامل واسم زوجي بالكامل
قلت نعم :
قلت مين معي : قال مدير الديوان ؟؟؟؟؟؟؟؟؟؟؟؟؟وقال اسمه
قال كيف : تقدمي بكرت أبوك وأنت متزوجه تلخبطت صكيت باب غرفتي وصرت أقول له أنا شفتها رؤيا وقام سمعني كلام أنا بكيت وبحرقه قلت : طيب أنا نقلت أنا وأولادي وتذكرت الحساد وفرحتهم وأحسه سكت للحظه وقال خلي زوجك يمرنا يوم السبت
واتصلت على أختي وعلمتها واتصلت على زوجي وأنا أبكي انفجع على باله الأولاد صار فيهم شيء وعلمته بالحكايه كلها ماني عارفه ايش أسوي وطبعا أختي الثانيه لا أتصلوا عليها ولاشيء أنا الي تغربلت بس الموقف هذا خلاها تموت خوف
وأتصلت على مديرة الديوان أبغى أتاكد ايش الي صار والي بيصير تخيلوا قالت : يقول مدير الديوان إنه لما رجع البيت جالس يفكر فيني رحمني وكأني وحده من بناته تطمنت شوي ولكن الخوف مازال لحد ما أدوام و أتاكد وجاء يوم السبت ولاخليت زوجي يروح للديوان وصرنا ندعي أنا وأخواتي طبعا ماقلنا لأمي خفنا عليها ومر يوم السبت ولما رفعوا الاسماء
وفي يوم الاربعاء اتصلوا علينا وقالوا نداوم والحمدلله أنا مستقر وضعي أنا وأختي ويوم السبت 21/11 داومنا ولما كتبت اسمي ومعي كرت أبوي وكلي ثقة ولاخايفه من المشرفات وبعد ماأخذت ورقة المباشره وأنا ظر بأختي في عيني دمعه وأختي تناظرني بعد هذا الجهد والتعب ولله الحمد توظفت وبكرت أبوي على الرغم إني متزوجه ولي الفخر يابوي وياعزي وسندي الله يشفيك ويعافيك
أنا أقولها للعالم كله
بفضل من الله عز وجل منّ الله علي بوظيفه وكان أبوي السبب الرئيسي للوظيفة تذكرتوا حلمي لما دخل أبوي وطلب منهم وظيفه وشفت اسمي الرباعي أمامي بالحلم
وكلمت وحده من البنات جاها رسمي معي بنفس القريه حتى توصلني للقريه ورحت معها الله يوفقها رغم إني ما أعرفها ووقعت ورجعنا أنا وهي والمرحلة الي أدرسها ثانوي وأول راتب آخذه كان حق شهرين ماني فاكره المبلغ عطيت أبوي وأمي وعمي وعمتي وخوات زوجي وأخواني الكل ابغاه يفرح وعاهدت نفسي أكفل يتيم

لي ولأبوي وكفلت يتيم والحمد لله من نفس المنطقه الي أنا فيها وتكفلت بالشغالة حقت أهلي ادفع لها راتبها لانها تخدم الانسان الي كان سبب لوظيفتي
وهذي كل الحكاية اتمنى إنكم تستفيدوا منها وأبشركم جاء نقلي لمدينتي أنا وأختي
والله يرزقكم بالوظائف جميعا والدعاء والاستغفار
يتبع باذن الله

09-13-2009, 01:32 PM

الداعية خالد السلطان يذكر موقف حدث معه:

في ليلة من ليالي التشريق (أيام الحج) وبالقرب من (البيت العتيق) القيت كلمة عن الاستغفار ومعناه وفضله وأثره وكان كلامي فيه الدليل والمنطق والعقل فلما انتهيت من كلمتي القصيرة (وهي عادتي) طلب احد الحاضرين الحديث معي على انفراد فقبلت الحديث معه فبدأ بسرد قصته مع الاستغفار.
بو يوسف: انا تزوجت ولله الحمد ولكن زوجتي تأخرت بالانجاب فقمت ببذل الاسباب، ما سمعت عن طبيب إلا زرته ثم سافرت بعد ذلك للخارج التمس العلاج والكل يؤكد بقوله (ما فيك إلا العافية انت وزوجتك) فرجعت الكويت وكلي رجاء بالله (والله على كل شيء قدير).
قلت: اسأل الله ان يرزقك الذرية الصالحة يا بو يوسف وعليك بالدعاء خاصة انك في ايام عظيمة وفي مكان عظيم وأنت اليوم مجاور (البيت العتيق).
بو يوسف: آمين لكن بعد ما خلصت قصتي.
قلت: كمل يا بو يوسف كلي اذن صاغية.
بو يوسف: في يوم من الايام وأنا استمع لإذاعة القرآن الكريم (السعودية) سمعت من يقرأ الآية التي ذكرتها يا شيخ في كلمتك من سورة نوح (فقلت استغفروا ربكم انه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم انهارا).

فشرح الشيخ الآية وبين ان الاستغفار طريق لجلب الاطفال فعلقت الكلمات في بالي فلما رجعت للمنزل قلت لزوجتي ما سمعت وعزمنا على اخذ العلاج (الاستغفار) ليلا ونهارا سرا وعلانية (تدري يا شيخ ما حصل؟!!).
زوجتي حملت بنفس الشهر الذي استغفرنا فيه وجاء (يوسف) والحمد لله.
قلت: ما شاء الله صدق الله وهو خير الصادقين (والله لا يخلف الميعاد) وقال تعالى: (ومن أصدق من الله قيلا) (ومن اصدق من الله حديثا).
بو يوسف: شيخ إلى الان لم تنته قصتي بعد.
قلت: خلاص جاك الولد (شنو بعد).
بو يوسف: لما انتهت زوجتي من النفاس قلت لها: استغفري يا ام يوسف للثاني فاستغفرنا مثل الأول فحملت بنفس الشهر وجاء الثاني بحمد الله ولما انتهت من نفاسها الثاني قلت استغفري يا أم يوسف نبي ثالث فاستغفرنا فجاء الثالث ولله الحمد فلما انتهت زوجتي من نفاسها قالت يا بو يوسف وقف عن الاستغفار (بنية الاولاد) شوي حتى يكبر الأولاد وبعدها نرجع نستغفر للرابع بإذن الله.
قلت: الله يبارك لك بما رزقك ويجعل ذريتك قرة عين خاصة أنك رأيت آية من آيات الله فيك وفي زوجتك وفي ذريتك.
بو يوسف: آمين الله يستجيب دعاك لكن يا شيخ ما خلصت بعد من قصتي.
قلت: ما انتهت الاحداث بعد! اكمل يا ابا يوسف.
بو يوسف: بعدما كبر الاولاد قليلا قلت لأم يوسف عندنا ثلاثة اولاد ونرجو من الله ان يرزقنا (بنت حلوة) استغفري يا ام يوسف وأنت ترجين بنتا.. فسكت بويوسف.
قلت: الله يرزقك البنت كما رزقك الأولاد يا أخي الكريم.
بو يوسف: ابشرك يا شيخ أنا اليوم جئت الحج وزوجتي في النفاس مع بنتها الجديدة (انتهت قصة بو يوسف).

القصة السابقة فيها عدة أمور لازم نتعرف عليها حتى تكتمل المعاني:

(1) بان معك الاستغفار وفضله وآثره.
(2) الاستغفار يؤثر على حسب نية المستغفر اي لأي شيء تستغفر لطلب مال.. ولد. نجاح.. توبة.. فعلى نية المستغفر يكون الأثر بإذن الله.
(3) يحتاج الاستغفار لنية صادقة ومخلصة لله وأن تدرك معناه وأن تفهم المراد منه فالنية لها اثرها في حياتك كلها.
(4) الله لا يخلف الميعاد وإذا تخلف الاثر فاعلم ان هناك امرا تسبب به.
(5) الاستغفار كالدعاء اما يأتيك ما طلبت وإما يأتيك غير طلبك واما يصرف عنك سوءاً بسبب استغفارك او ان يدخر الله لك ما استغفرت ليوم القيامة فيجازيك جزاء الضعف عنده جل في علاه
يتبع باذن الرحمن

09-14-2009, 01:12 PM

قصه احدى الزميلات
حدثت لها شخصيا تقول بينما نحن في الطريق في رحله عائليه تذكرنا ان نسينا موصل ا لغاز وكنا باخر الطريق مانقدر نرجع فاقلنا ايش الحل وكيف نسوي الغدا فكان عمي معانا وكان رجل دين قال لنا عليكم بالاستغفار استغفرو ماستغفرت الا واجابالله دعوتي للاسف العائله ضحكت عليه قالو صح يمكن ينزل من السماء او نلقاه قدامنا نابت فاخذ عمي يستغفر الله حتى وصلنا نزلنا في الموقع ونسينا الموضوع لانه كان مستحيل نرجع ورحنا نتمشى وعمي راح يتمشى لحاله مادرينا الا راجع لنا موصل الغاز( الي) بيده لقاه في مكان عائله ناسيته سبحان الله شفتو فضل الاستغفار حتى في الامورالصغيره فما بالكم بلامور الكبيره استغفر الله استغفر الله استغفر الله استغفر الله استغفر الله استغفر الله استغفر الله استغفر الله استغفر الله اسسسسسسسسسسسسسسسسستغفر الله
تقول احدى الاخوات
والله عن تجرية شخصية كان عندي قرض وما كنت أفكر انه راح ينقضي لو بعد عشرين سنه المهم مرة وانا اقرى كتاب عن أحوال الناس بالجنة والنار والا أقرى انه آكلين الربا يسبحون بنهر من دم ويتلقمون بآخر النهر حجارة ويردون يسبحون فيه مرة ثانية وصراحة أبوي الله يغفر له حبيبي اهو اللي نبهني عن انه القروض تعتبر ربا فقعدت أستغفر وأصليي والله اني ما نمت ليلتها من البجي وانا مابي يكون مصيري هالمصير أعوذ بالله عشان حاجات دنيوية وظليت أستغفر والله ييا بنات ما دار أسبوع الا انفرجت من ربي وساعدتني انسانة عزيزة على قلبي ودفعن عني القرض بس اتفقنا انه ادفع لها كل شهر وبمدة قصيرة راح أقدر أقضي ديني بدون فوايد وهذي اللي تعتبر ربا ربي يبعدنا عنها .

يتبع باذن الله

09-14-2009, 01:54 PM

اخت اخرى تقول :

انا بقولكم نصيحتي لوحده من صديقاتي فاتها قطار الزواج

قلت لها تحري اوقات الاجابه وابعدي عن كل الملهيات وافضل مكان السطح بعيد عن الملهيات والصور والاشياء اللتي تطرد الملائكه وادعي بهاالادعيه من قلب وخصوصا قبل اذان المغرب بربع ساعه واحسني الظن بالله عزوجل وانه مايخيب دعوة راجيه وكثري من الاستغفار طول يومك وحاولي ان قدرتي تقرين سورة البقرة كل ليله وتتسنين وتدعين باللي تمنينه بعدها والله ثم والله ان تشوفين ماتمنيتيه وان الله مايردك

وصديقتي اخذت بنصيحتي عن قناعه وسوت اللي قلت وكلها امل برب العالمين انه مايردها

اقسم بالله العظيم خلال اسبوعين وهي مخطوبه لشاب من خيرة الشباب وبعد اسبوعين ثانيه تملكت عليه والحين متزوجه والى الان ماتركت الاستغفار صار لها 9 شهور متزوجه تقول كل يوم صرت استغفر واحمدالله واشكره على النعمه اللي انا فيها ومنعت زوجي من دخول التلفزيون بيتنا ومع الدعاء والاستغفار صار زوجها ملتحي ومايترك قيام الليل مع انه في البدايه بس يقوم بفروضه...لاتتهاونون يابنات بالاستغفار
يتبع باذن الرحمن

09-19-2009, 04:14 PM

حضرت محاضرة لاحد الداعيات وكانت تتكلم عن فضل الاستغفار وذكرت قصة ان رجل كان عليه دين كثير وهو فقير ولم يستطع ان يرد الدين لاصحابه ففي النهار بابه يطرقه الرجال يريدون ارجاع اموالهم وفي الليل الهم يقتله وهو محتار جدا فسمع حديث الرسول صلى الله عليه وسلم (من لزم الاستغفار جعل الله له من كل هم فرجا ومن كل ضيق مخرجا ورزقه من حيث لايحتسب)فلزم هذا الرجل الاستغفار وتقول الداعيه ان هذا الرجل كان يمشي وهو يستغفر وكان بقر ب مكتب عقار فراى صاحب العقار يسلم عليه ويعطيه مبلغ كبير من المال قال الرجل ولماذا اعطيتني هذا المال وانا لااعرفك وماالمناسبه قال صاحب العقار لرجل انني نذرت اذا بيعت لي ارض بمبلغ كذا وكذا ساعطي اول واحد اراه هذا المبلغ

فقضى هذا الرجل ديونه
فما اكرمك يالله

09-19-2009, 04:17 PM

قصه اخري
الاستغفار فضلة كبير وحصلت لي مع الاستغفار قصص كثيرة
منها: اخي كان بيقدم على وظيفة عن طريق الانترنت
وجلس ثلاث ايام مايفتح معة الموقع من الزحمة وقال خلاص تعبت قلت بسجلك واستغفرت ودخلت الموقع وفتح
وسجلتة والتحق بالوظيفة ولله الحمد والمنة

يتبع

09-21-2009, 05:00 PM

تقول احدى الاخوات:

قصتي فضيعة تعالوا اسردها حبة حبة .
كان معي زميلة تحكي لنا نحن البنات ايام الكلية قصص رائعة مفيدة الله يذكرها بالخير .
المهم ما اطول عليكم حبيباتي ..
تقول فيه وحدة من قريباتها كانت تعاني من عدم الانجاب لسنوات عديدة والبنت هذي لا تعمل رغم انها متخرجة من كلية التربية الادبية اللي في الملز قبل ان تكون مجمع .\الكليات المهم ظلت فترة تحاول في الانجاب اوحتى وظيفة تسليها وتشيل عنها هم التفكير في العيال وكان هم زوجها رغم هذه السنوات العديدة الاتحمل ببنت لان جماعتهم باقي عندهم فكرة الولدولاالبنت .
بعد الطفش من لمراجعات في العيادة قابلت بنت ملتزمة حافظة لكتاب الله كما قالت فسالتها البنت اش فيك حزينة ومكتئبة لا يكون احدالعيال تعبان فصاحبتنا سقطت دمعتها وقالت من وين ياحسرة ما في البيت الا دمى لكل واحد له اسم فعندي خالد ومحمد وصالح باسم ابوية ونورة باسم امي . قالت وحدي الله وما ابغى اشوف احد اليوم زعلان لان اليوم اتممت تسميع اجزاء القران على المعلمة (بنات على فكرة صاحبتنا ام الدمى التحقت بدار ذكر في اسمه دار القران كان تعرفونه .)فحكتلها البنت السالفة من الى وكيف ان زوجها يعاملها الشين لاجل الانجاب ويهددها بالاخرى والبنت تحبه وتتمنى الموت ولا الضرة .

المهم قالت الملتزمة وكلنا ان شاء ربي ملتزمات بطاعته ولانزكي انفسنا ؟ الزمي الاستغفار وان لم يتبدل حالك باذن الله فلا تسميني فلانه .

سبحان الله بعد فترة حملت البنت وفي نفس الشهر نزل تعيينها في منطقة النماص في الجنوب وبعد تسعة اشهر بشرها الدكتور بمولود اسمته (عبد الله )وبعد النفاس فقط باشهر قليلة حملت
وكانت نهاية مانقلته زميلتنا عنها
اعطاها الله الولد((البنين ))
الوظيفة ((اموال ))
الجو الرائع الممطر ((يرسل السماء عليكم مدرارا ))

سبحان ربي ما اكرمه وارحمه بعباده
يتبع

09-21-2009, 06:10 PM

مجهود رائع
جزاك الله الف خير
وجعله في ميزان حسناتك

09-22-2009, 02:15 PM

جزيت خيرا عالمرور الكريم

أدوات الموضوع	ابحث في الموضوع
مشاهدة صفحة طباعة الموضوع أرسل هذا الموضوع إلى صديق	ابحث في الموضوع: البحث المتقدم
أنماط عرض الموضوع
العرض العادي الإنتقال إلى العرض المتطور الإنتقال إلى العرض الشجري

Add Ur Link
أعلن معنا	دليل مواقع ديكور أون لاين	مول ديكور أون لاين	منتديات الديكور العامة
قسم الإستشارات	أعلن معنا	أعلن معنا	أعلن معنا

حملة إلزمي الاستغفار ..... وستأتيك الدنيا راغمه وتسعدي في الدارين

samsom جزيت خيرا ع المرور الكريم...